Forskrift 17. januar 2025 nr. 38
om område for obligatorisk opplæring i bruk av beltemotorsykkel (snøskuter) ved Robjørgane,
Stryn kommune, Vestland
(Forskrift om snøscooteropplæring, Stryn)
Fastsett av Statsforvaltaren i Vestland 17. januar 2025 med heimel i lov 10. juni 1977 nr. 82 om motorferdsel i utmark og vassdrag (motorferdselloven) § 4a og forskrift 15. mai 1988 nr. 356 for bruk av motorkjøretøyer i utmark og på islagte vassdrag § 3 første ledd bokstav h.
Denne forskriften og tilsvarende forskrift for Voss (se rammen nedenfor), gjelder som forskrifter for snøscooteropplæring for alle kommuner i Vestland fylke.
Denne forskrifta fastset område i Vestland fylke for obligatorisk opplæring i førarkort klasse S, for bruk av beltemotorsykkel (snøskuter).
Den obligatoriske opplæringa i førarkort klasse S skal skje i samsvar med kapittel 14 i forskrift 1. oktober 2004 nr. 1339 om trafikkopplæring og førarprøve m.m. Førarkort i klasse S er definert i § 3−17 i forskrift 19. januar 2004 nr. 298 om førarkort m.m.
Eit område ved Robjørgane i Stryn kommune er sett av til opplæring i førarkort klasse S for trinn 2, 3 og 4 i bruk av beltemotorsykkel (snøskuter).
Avgrensing av øvingsområdet går fram av vedlagde kart. Området er på om lag 1200 dekar. Vedlagde kart er ein del av denne forskrifta.
Området kan nyttast til øvingskøyring etter reglane for opplæring til førarkort klasse S under kontroll av godkjent opplæringsinstitusjon. Opplæringa kan skje i tidsperioden 2. januar til 30. mars, med unntak for perioden frå fredag før palmehelg til og med 2. påskedag. Området kan nyttast alle verkedagar i gyldig periode. Helgebruk er tillate utanom eventuelle helger som grunneigarane før sesongen har bestemt skal vere utan køyring. Øvingskøyring kan berre skje når snødekke i området er tilstrekkeleg til at køyringa ikkje fører til skader i terrenget.
Praktisk opplæring i førarkort klasse S for bruk av beltemotorsykkel (snøskuter) i utmark er forbode i Vestland fylke utanfor det avsette området ved Robjørgane i Stryn kommune og i Holbygda i Voss herad.
Forbodet gjeld ikkje i område avsett til spesialområde for motorsport, motocross o.l. i reguleringsplan, og der dei utfyllande føresegnene til planen opnar for køyring med beltemotorsykkel (snøskuter) i Vestland. For slike område kan øvingskøyring i trinn 2 og delar av trinn 3 gjennomførast.