Føremålet med denne forskrifta er ut frå eit samfunnsmessig heilskapssyn å regu­lere motorferdsel i utmark og vassdrag med sikte på å verne om naturmiljøet og fremje trivsel.

Forskrifta gjeld for Ål kommune.  Forskrifta utfyller det regelverket som er gitt i lov 10. juni 1977 nr. 82 om motorferdsel i utmark og vassdrag, samt nasjonale forskrifter gjevne i medhald av lova.

Med motorferdsel meiner ein i denne forskrifta bruk av køyretøy (bil, traktor, motorsykkel, beltebil, snøskuter o.l.) og båt eller anna flytande eller svevande fartøy drive med motor, samt landing og start med motordrive luftfartøy.

Med motorfartøy meiner ein i denne forskrifta båt eller anna flytande eller svev­ande fartøy drive med motor.

I samband med motorisert ferdsel i utmark gjeld følgjande reglar:

• all motorferdsel i utmark krev samtykke frå grunneigar.
• all motorferdsel i utmark skal skje omsynsfullt og på ein skånsam måte slik at det ikkje oppstår skade på person, natur eller eigedom, eller at ferdselen er til unødig sjenanse for andre.

Det er eit generelt forbod mot all bruk av vasskuter i Ål kommune.

På vatn i kommunen med areal større enn 2 kvadratkilometer er det lov å nytte båt med motor.

I øvste tredjedel av Strandafjorden (nærmast Kleivi) er det ikkje lov å nytte mo­tor­fartøy.  Bruk av motorbåt i samband med fiske er unntatt frå dette forbodet.

Maksimal motorstyrke på motorbåt i Strandafjorden er 10 hk.

På vatn som er mindre enn 2 km², kan det med grunneigars samtykke nyttast båt med motorstyrke inntil 10 hk for naudsynt transport med følgjande føremål:

• For turisthytter/serveringsstader som ledd i næring.
• I samband med kultivering av fiskevatn.
• I samband med jakt på hjortevilt og garnfiske.
• Transport av arbeidsfolk, materiell og utstyr i samband med lovleg oppføring, tilbygg eller reparasjon av bygningar og anlegg.
• Til og frå hytte utan vegsamband.

I Ål kommune er det forbod mot landing og start med luftfartøy, med mindre noko anna følgjer av denne forskrifta.  Unntatt frå dette forbodet er landing og start med luftfartøy på:

• Rødungen (sør)
• Stolsvassmagasinet i Djup
• Strandafjorden (unnateke øvste 1/3 del, dvs. nærmast Kleivi)
• Flævatn/Gyrinosvatnet
• Vatsfjorden
• Bergsjøen
• Tingvollfjorden.

All transport skal utførast av personar eller selskap med luftfart som næring.

I spesielle tilfelle kan kommunen etter søknad gi løyve til bruk av motorfartøy eller luftfartøy utanfor dei nemnde områda i § 7 eller dei nemnde føremåla i § 6.  Det kan stillast vilkår til løyvet.

Løyve innskrenkar ikkje den tilgang grunneigar og brukar har etter gjeldande retts­reglar til å forby eller snevra inn motorferdsel på sin eigedom.

Vurdering av søknaden skal følgje reglane i lov 10. juni 1977 nr. 82 om motorferd­sel i utmark og vassdrag, § 6.

I verneområda gjeld eigne reglar om motorisert ferdsel.

Brot på denne forskrifta vert straffa etter reglar i lov 10. juni 1977 nr. 82 om mo­torferdsel i utmark og vassdrag.

Forskrifta trer i kraft så snart den er kunngjort i Norsk Lovtidend.1  Frå same tids­punkt vert forskrifta vedteke av Ål kommunestyre 25. august 1988, k-sak 103/88 opp­heva.