Forskrifta skal legge til rette for at utleige av små elektriske køyretøy på offentleg grunn i Stord kommune bidrar til tilgjengelege og trygge offentlege rom, effektiv for­valting, klimavenlege løysingar, og godt miljø og lokalmiljø.

I forskrifta gjeld desse definisjonane:

• Offentleg grunn:  Område av Stord kommune der kommunen, fylkeskommu­nen eller staten er eigar av grunnen eller har inngått avtale med privat grunn­eigar.  Til dømes vegar, fortau, parkar og torg.
• Små elektriske køyretøy:  Liten elektrisk motorvogn (elsparkesyklar o.l.)1 og sykkel med hjelpemotor (elsykkel)2.
• Utleigar:  Verksemd som leiger ut små elektriske køyretøy.
• Plassering:  Ei kvar plassering eller flytting, omplassering eller rydding som utleigar eller deira representantar utfører med utleigar sine små elektriske køy­retøy.

Utleige av små elektriske køyretøy på offentleg grunn i Stord kan berre skje når utleigar har gyldig løyve med kommunen.  Løyve gjeld for to år.  Berre eitt utleige­firma kan ha løyve frå kommunen til ei kvar tid.

Høve til å inngå løyve skal kunngjerast seinast fire veker før søknadsfristen.  Kunn­gjeringa skal innehalde søknadsfrist, informasjon om kor og korleis søknaden skal sendast, kva for opplysningar søknaden skal innehalde, vilkår i løyve, kriterium for rangering av søkjarar og kommunen sin frist for sakshandsaminga.  Søknader som blir levert etter søknadsfristen blir avvist.  Dersom søknaden har manglar, skal søkjar få frist på ei veke for retting av søknaden.  Søknadar som ikkje blir retta innan denne fristen blir avvist.

Søknad om avtale skal minst innehalde:

• søkjar sitt namn, adresse, organisasjonsnummer, e-postadresse, telefonnum­mer og kontaktperson
• stadfesting på registrering i Einingsregisteret
• plan for korleis søkjar skal organisere fjerning, flytting, omplassering og rydd­ing av køyretøy etter forskrifta § 6 d
• dokumentasjon som viser rutinar for branntryggleik, samt vurderingane som ligg til grunn for desse
• dokumentasjon som viser rutinar for handtering av defekte batteri, og batteri som skal til gjenvinning
• dokumentasjon frå firmaet si verksemd i andre byar, til dømes rutinar, respons­tid og referansar
• stadfesting på at søkjar fyller krav til teknologi som er omtala i § 6 e.

Følgjande vilkår gjeld:

• Tal og plassering av små elektriske køyretøy skal inngå i kunngjering av søk­nad om løyve.  Tal og plassering skal vurderast på nytt og eventuelt endrast etter ei prøvetid på tre månadar.  Kommunen kan endre plassering av køyre­tøya i heile avtaleperioden.  Kommunen kan i heile avtaleperioden på eiga hand og etter søknad frå løyvehavar:
  • Auke og senke antalet køyretøyplasseringar
  • Endre det maksimale talet på køyretøy.

  Utleigefirma skal gjennomføre endringa seinast fem dagar etter varsling, og endring av antal køyretøy innan rimeleg tid.  Ved første kunngjering skal følg­jande gjelde:

  • Maksimum tal små elektriske køyretøy:  250
  • Plassering/fordeling av utleigar sine køyretøy skal vere slik:

    Baseområde	Stad	Maksimal del av utleigar sine køyretøy
    Rommetveit	Ved Høgskulen	50
    Leirvik/Vabakkjen	Kulturhuset, p-plass Vabakkjen	100
    Sagvåg	Ved Blåbygget	50
    Ådland	Ved Stord sjukehus	20
    Heiane	Ved Heiane senter	30

  Stord kommune sørgjer for at det er oppmerka parkeringsområde for el­sparkesyklar på kvar utplasseringsstad.

  I tillegg kan Stord kommune stille krav til utleigeselskapet om parkerings­stativ i visse områder.

  Ved seinare kunngjeringar kan tal, plassering og fordeling endrast utifrå er­faringar og evaluering av tiltaket.

• Tid for utleige skal vere alle dagar heile døgnet med følgjande unntak:
  • Fredag 22.00–laurdag 05.00 og laurdag 22.00–søndag 05.00
  • 22.00–05.00 natta før alle offentlege fri- og helgedagar
  • I periodar med glatt underlag.
• Alle små elektriske køyretøy skal merkast tydeleg med firmanamn og kontakt­informasjon til utleigar, samt ID som kan lesast manuelt og digitalt.  Det skal vere kopling mellom digital ID og fysisk ID.
• Utleigar pliktar å setje i verk midlertidige og permanente digitale soner (geo­gjerder) overfor brukarane.  Oversikt over soner skal inngå i kunngjering av søknad om løyve.  Sonene kan gjelde for heile eller deler av døgnet og/eller for bestemte dagar eller vekedagar, og kan medføre:
  • Forbod eller anna regulering av plassering og parkering.
  • Bruksforbod.
  • Avgrensing av fart.

  Ved innføring av nye geogjerde skal kommunen varsle utleigar og formidle nødvendige data minimum 1 veke på førehand.

• Utleigar må oppfylle krav til nødvendig teknologi for å ta imot data, setje i verk geogjerde, og dele data om sine køyretøy med kommunen.  Rapporteringssys­tem skal til ei kvar tid vere i samsvar med kommunen sine standardar for regu­lering og rapportering.  Krav til teknologi og rapportering skal inngå i kunngjer­ing av søknad om løyve.
• Utleigar skal informere brukarane om gjeldande reglar for bruk og råd for trygg ferdsle.
• Små elektriske køyretøy skal ikkje vere kjelde til forstyrrande lyd eller lys når køyretøyet er parkert.
• Utleigar skal på eige initiativ snarast, og seinast innan 3 virkedagar, fjerne, flytte og rydde små elektriske køyretøy:
  • Som er til hinder for generell framkomst
  • Som er parkert utanfor parkeringsområde i sentrumssonene jf. § 6 d
  • Som er velta, ikkje fungerer eller forsøplar lokalmiljøet
  • Som er til hinder for kommunen sine drifts- og vedlikehaldsoppgåver.
• Køyretøy som blir nytta til drift av utleigeverksemda skal vere nullutsleppskøy­retøy.
• Ved oppbevaring av køyretøy og batteri, lading av batteri og anna vedlikehald skal branntryggleiken vere ivareteke.  Plassering og val av lagerlokale må skje i samråd med det lokale brann- og redningsvesenet, men er ikkje tillate i føl­gjande områder eller bygningar:
  • Leirvik og Sagvåg sentrum
  • I bygg som inkluderer bueiningar
  • I tilknyting til samfunnskritiske objekt
  • Ved kulturhistoriske bygg.
• Selskap som driv med utleige av elsparkesyklar og andre små elektriske køy­retøy i Stord kommune skal ha tariffavtale for sine tilsette.

Stord kommune kan fjerne og ta i forvaring små elektriske køyretøy for utleigar si rekning.  Dette følgjer av lov om utleie av små elektriske køyretøy på offentleg grunn, § 6.

Dersom små elektriske køyretøy er til vesentleg fare for ålmenta eller drift av offent­leg grunn kan kommunen ta små elektriske køyretøy i forvaring snarast.  I slike høve skal utleigar varslast.

Utleigar skal betale gebyr for dekning av kommunen sine utgifter til administrasjon, tilrettelegging, tilsyn og kontroll av utleigeverksemda regulert i lov om utleie av små elektriske køyretøy på offentleg grunn, denne forskrifta og gjeldande løyve med kom­munen.  Fastsetjing av gebyr skal følgje sjølvkostprinsippet, og skal gjerast kjent i kunngjering av høve til å inngå avtale/løyve.

Gebyret forfell til betaling forskotsvis den dagen ny avtaleperiode startar.  Vidare betalingsplan skal fastsetjast i løyve med kommunen.  Gebyret vil ikkje bli refundert dersom utleigar mislegheld løyve, ikkje tar i bruk løyve, eller avsluttar verksemda si i løpet av perioden løyvet gjeld.

Utgifter som kommunen har hatt i samband med fjerning og forvaring av små elek­triske køyretøy inngår ikkje i utrekninga av dette gebyret.

Dersom utleigar avsluttar utleigeverksemda i avtaleperioden skal kommunen straks varslast skriftleg om tidspunkt for avslutning.  Avslutning av verksemda medfører opp­seiing av løyvet frå kommunen frå avslutningsdatoen.  Avslutningsdato vert rekna frå 1. i komande månad etter signert oppseiingsdato.  Utleigar skal fjerne alle sine små elektriske køyretøy frå offentleg grunn snarast, og seinast innan ei veke etter avslut­ningsdato.

Kommunen kan når som helst seie opp avtalen/løyvet med utleigeselskap.  Oppsei­ing treng ikkje grunngjevast men må vere skriftleg.  Utleigar skal varslast om oppsei­ing seinast 6 månader før oppseiingsdato.

Kommunen kan trekke tilbake løyvet med umiddelbar verknad ved gjentatte eller grove brot på lov om utleige av elektriske køyretøy på offentleg grunn, denne for­skrifta eller vilkår i løyvet.  Følgjande brot vil etter konkret vurdering kunne bli rekna som grove:

• Brot på § 6 a.  Tal og plassering av køyretøya
• Brot på § 6 b.  Tid for utleige
• Brot på § 6 e.  Teknologi og deling av data
• Brot på § 6 h.  Fjerning, flytting og rydding
• Brot på § 6 j.  Branntryggleik
• Brot på § 8.  Innbetaling av gebyr.

Ved vurdering om løyve skal trekkast tilbake skal det leggjast særleg vekt på om utleigar har latt vere å utbetra eit tilhøve etter å ha fått eit klart varsel om at tilhøve må utbetrast.

Det er høve til å klage på enkeltvedtak i samsvar med forvaltningslova kapittel VI.

Rådmannen utøvar mynde for denne forskrifta.

Forskrifta trer i kraft straks.