Forskrifta skal legge til rette for at utleige av små elektriske køyretøy på offentleg grunn i Bjørnafjorden kommune bidreg til framkommelege og trygge offentlege rom, klimavennlege løysingar og eit godt miljø og lokalmiljø.  Forskrifta skal bidra til effektiv forvaltning av løyve til utleige av små elektriske køyretøy.

I forskrifta gjeld desse definisjonane:

• Offentleg grunn:  Område i Bjørnafjorden kommune der kommunen, fylkes­kommunen eller staten er eigar av grunnen, eller som inngår i areal for offent­leg ferdsel, til dømes vegar, fortau, parkar og torg.
• Små elektriske køyretøy:  Små elektriske køyretøy1 som elektriske sparke­syklar og sykkel med hjelpemotor (elsykkel)2.
• Utleigar:  verksemd som leiger ut små elektriske køyretøy.
• Plassering:  Ei kvar plassering eller flytting, omplassering eller rydding som utleigar, eller representantar som opptrer på vegner av utleigar, utfører med ut­leigar sine små elektriske køyretøy.

Forskrifta gjeld all bruk av offentleg grunn i Bjørnafjorden kommune til utleige av små elektriske køyretøy.  Forskrifta gjeld ikkje for utleige av sykkel med hjelpemotor (elsykkel).  Bruk av private elsparkesyklar eller andre private elektriske køyretøy er ikkje omfatta av forskrifta.

Utleige av små elektriske køyretøy på offentleg grunn i Bjørnafjorden kommune kan berre skje med godkjent løyve frå Bjørnafjorden kommune.

Bjørnafjorden kommune gir løyve til inntil tre utleigarar om gongen.  Eit løyve varer i inntil 3 år.

Kommunen tildeler løyve kvart tredje år.  Utlysing av løyve skal kunngjerast sein­ast fire veker før søknadsfristen.  Kunngjeringa skal innehalde søknadsfrist, informa­sjon om kvar og korleis søknaden skal sendast inn, kva for opplysingar søknaden skal innehalde, vilkår for løyve, krav til teknologi og rapportering, kriterium for rangering av søkarar og kommunen sin frist for saksbehandlinga, og eventuelt andre opplysnin­gar som kommunen ser behov for.

Søknadar som blir leverte etter søknadsfristen blir avviste.  Dersom søknaden har manglar, skal søkar få frist på ei veke for retting av søknaden.  Søknadar som ikkje blir retta innan denne fristen blir avvist.

Ein søknad om løyve skal minst innehalde:

• Søkar sitt namn, adresse, organisasjonsnummer, e-postadresse, telefonnum­mer og kontaktperson.
• Stadfesting på registrering i Enhetsregisteret.
• Tal små elektriske køyretøy det blir søkt om løyve til.
• Plan for korleis søkar skal organisere fjerning, flytting, omplassering og rydding av køyretøy etter forskrifta § 11
• Dokumentasjon som viser rutinar for branntryggleik, samt vurderingane som ligg til grunn for desse.
• Dokumentasjon som viser rutinar for handtering av defekte batteri, og batteri som skal til gjenvinning.
• Dokumentasjon på at utleigar oppfyller krav til teknologi som er omtala i § 12.
• Dokumentasjon på at elektrisk køyretøy som skal leigast ut i Bjørnafjorden kommune vil respondere korrekt på reguleringar og geosonar som omtala i for­skrifta § 9.
• Dokumentasjon på ansvarsforsikring på utleigde køyretøy.

Kommunen kan utdjupe dokumentasjonskrava ved kunngjering av løyve.

Aktørar som søker om løyve etter forskrifta kan ikkje ha same eigar og/eller høyre til same konsern, slik konsern er definert i aksjelova § 1−3.

Dersom det er fleire enn tre søkarar som oppfyller minimumskrava, skal utveljing skje etter følgande kriterium:

• Kvalitet på utleigar sine rutinar og verkemidlar for å oppnå god parkeringsprak­sis, samt plan for korleis utleigar skal organisere fjerning, flytting og rydding av køyretøy etter forskrifta § 11.
• Kvalitet på utleigar sine rutinar og verkemidlar for å sikre trygge offentlege rom, herunder; korleis søkaren fremjar lovleg og omsynsfull ferdsel, korleis søkar tek i vare tryggleiken til tredjepersonar og korleis søkar tek i vare tryggleiken til føraren av køyretøyet.
• Klima- og miljøvennleg drift, herunder;

  levetid på køyretøy, rutinar for handtering av avfall/defekte køyretøy og kompo­nentar.

Kommunen kan utdjupe innhald i kriterium ved kunngjering av løyve.

Totalt tal små elektriske køyretøy som kan utplasserast i Bjørnafjorden kommune skal inngå i kunngjering av høve til å søke om løyve.  Tal køyretøy skal vere likt for­delt mellom utleigarane som får innvilga løyve.

Utleigar pliktar å sikre at maks tal elektriske køyretøy blir overhalde.

Kommunen kan i løpet av perioden for løyve auke maksgrensa dersom det vert vurdert som forsvarleg.

Kommunen kan i løpet av perioden for løyve redusere tal elektriske køyretøy der­som kommunen vurderer det som nødvendig for å ta i vare omsynet til tryggleik og generell framkomst.

Ved eventuell nedjustering av maks tal køyretøy skal utleigefirma få ein rimeleg frist for å innrette seg etter dei nye avgrensingane.

Kvar og korleis små elektriske køyretøy kan plasserast skal inngå i kunngjering av høve til å søke om løyve.  Kommunen utarbeider eit overordna sonekart for ferdsel med små elektriske køyretøy som vil følgje kunngjeringa.  Sonekartet skal vere fleksi­belt og skal styrast gjennom eit delt datasett (API).  Sonekartet kan endre seg i løpet av perioden for løyvet.

Sonene kan gjelde for heile eller deler av døgnet og/eller for bestemte dagar eller vekedagar, og kan medføre

• Forbod eller anna regulering av plassering og parkering av små elektriske køy­retøy
• Bruksforbod.
• Avgrensing av fart
• Tidspunkt for når tenesta kan vere tilgjengeleg ved spesielle arrangement.

Regulering som nemnt i bokstav a–c kan vere mellombels eller permanent.

Utleigar pliktar å setje i verk midlertidige og permanente digitale soner (geogjerde) overfor brukarane.

Bjørnafjorden kommune skal varsle utleigarane om nye eller endra reguleringar. Ved endringar i sonene eller innføring av nye geogjerde skal utleigar setje i verk end­ringane innan utgangen av påfølgande arbeidsdag, med mindre kommunen har sett ein lengre frist i varselet.

Utleige kan skje alle dagar, heile dagen, unntatt i tidsrommet 24.00–05.00 natt til laurdag, natt til søndag og natt til raude dagar.

Kommunen kan oppheve nattestenginga mellombels eller på ubestemt tid dersom det blir vurdert som forsvarleg.

Kommunen kan krevje stans i utleiga på dagar der det er snø og is.

Utleigar skal på eige initiativ, fortløpande fjerne, flytte og rydde små elektriske køyretøy:

• Som er til hinder for eller vanskeleggjer generell framkomst
• Som er plassert i område der det ikkje er lov å setje frå seg eller parkere små elektriske køyretøy, jf. § 9.
• Som er velta, ikkje fungerer, har havna i elv, vatn eller sjø, eller på anna måte forsøplar lokalmiljøet.
• Som er til hinder for vegeigar/grunneigar sine drifts- og vedlikehaldsoppgåver (til dømes vinterdrift, vårreingjering, vegarbeid, lekkasjesøk mfl.)
• Når det er nødvendig ved brann, vasslekkasje eller andre liknande hendingar.

Kommunen kan i tillegg fastsette særskilte fristar for rydding og fjerning.

Utleigar må oppfylle krav til nødvendig teknologi for å ta imot data, setja i verk geogjerde, og dele data om køyretøya sine med kommunen.  Rapporteringssystem skal til ei kvar tid vere i samsvar med kommunen sine standardar for regulering og rapportering.  Krav til teknologi og rapportering skal inngå i kunngjering av søknad om løyve.

Alle små elektriske køyretøy skal vere synleg merka med firmanamn og kontaktin­formasjon til utleigar, og ID som kan lesast manuelt og digitalt for å identifisere køyre­tøyet.

Utleigar skal informera brukarane om gjeldande reglar for bruk, og råd for trygg ferdsle.

Utleigar skal ha teknologi som sikrar at køyretøy blir låst ved 5 minutts inaktivitet.

Ved oppbevaring av køyretøy og batteri, lading av batteri og anna vedlikehald, skal branntryggleiken vera ivareteken.  Plassering og val av lagerlokale må skje i samråd med det lokale brann- og redningsvesenet, men er ikkje tillate i følgjande område eller bygningar;

• I bygg som inkluderer bueiningar
• I tilknyting til samfunnskritiske objekt
• Ved kulturhistoriske bygg.

Utleigar skal hindre sjenerande lyd og lys frå små elektriske køyretøy.  Alarmfunk­sjonar med lyd og lys skal vere avslått i tidsrommet mellom kl. 20.00–07.00 natt til kvardagar, og mellom kl. 20.00–09.00 natt til laurdag, søndag og heilagdagar.

Eventuelle statuslys på køyretøy skal lyse fast med ein lysstyrke som ikkje er sje­nerande for omgivnadane.

Bjørnafjorden kommune kan fjerne og ta i forvaring små elektriske køyretøy, og krevje betaling, etter § 6 i lov 18. juni 2021 nr. 139 om utleie av små elektriske kjøre­tøy på offentlig grunn.

Utleigar skal betale gebyr for dekking av kommunen sine utgifter til administrasjon, tilrettelegging, tilsyn og kontroll med utleigeverksemda regulert i lov om utleige av små elektriske køyretøy på offentleg grunn, denne forskrifta og gjeldande løyve frå kommunen.

Storleiken på gebyret skal tilsvare kommunen sine estimerte utgifter til administra­sjon, tilrettelegging, tilsyn og kontroll med utleigeverksemda, og skal gjerast kjend ved utlysing av løyve.

Gebyret forfell til betaling forskotsvis den dagen avtaleperioden for løyvet startar. Vidare betalingsplan skal fastsetjast i løyvet frå kommunen.  Gebyret vil ikkje bli re­fundert dersom utleigar mislegheld løyvet, ikkje tar i bruk løyvet, eller avsluttar verk­semda si i løpet av perioden løyvet gjeld.

Utgifter som kommunen har i samband med fjerning og forvaring av små elektriske køyretøy (jf. § 6 i lov om utleie av små elektriske kjøretøy på offentlig grunn og § 16 i forskrifta) inngår ikkje i utrekninga av dette gebyret, men blir kravd dekka utanom.

Utleigar har ikkje lov til å overføre løyvet til ein tredjepart.  Dersom utleigar avslut­tar utleigeverksemda i løpet av perioden det er gitt løyve, mister utleigar løyvet.  Utlei­gar skal straks varsle kommunen om tidspunktet for avslutning av verksemda.

Utleigar skal fjerne alle dei små elektriske køyretøya sine og eventuelt anna utstyr frå offentleg grunn snarast, og seinast innan ei veke etter at løyvet går ut, samt fjerne små elektriske køyretøy som er feilplasserte på privat grunn.  Det same gjeld dersom utleigar seier i frå seg løyvet, dersom løyvet blir trekt tilbake, dersom utleigeverk­semda faktisk blir avslutta og/eller dersom verksemda rettsleg sett blir avvikla eller går konkurs før løyvet går ut.

Ved fjerning av køyretøya og eventuelt anna utstyr skal utleigar syte for at desse blir behandla forsvarleg.

Bjørnafjorden kommunen kan trekke tilbake løyvet ved gjentakande eller grove brot på lov om utleige av små elektriske køyretøy, denne forskrifta eller vilkår for bruk av løyvet.

Særleg følgande brot vil etter konkret vurdering kunne bli rekna som grove:

• Manglande etterleving av maks tal elektriske køyretøy etter forskrifta § 8.
• Manglande implementering og etterleving av sone- og områdereguleringar etter forskrifta § 9.
• Brot på vilkår om nattestenging etter forskrifta § 10.
• Manglande fjerning, flytting eller rydding av elektriske køyretøy etter forskrifta § 11.
• Manglande etterleving av vilkår om deling av data, jf. forskrifta § 12.
• Manglande innbetaling av gebyr etter forskrifta § 17.

Ved vurdering av om eit løyve skal trekkast tilbake, skal det særleg vektleggast om utleigar har unnlate å utbetre eit forhold etter å ha fått eit klart varsel om at for­holdet må utbetrast.

Tildeling av løyve eller tilbaketrekking av løyve er enkeltvedtak som kan klagast over i medhald av forvaltningslova kapittel VI.  Kommunen sitt klageutval er klage­instans.

Kommunedirektøren utøver mynde etter forskrifta.

Forskrifta trer i kraft straks.