Vegtilsynet er Samferdselsdepartementet si fageining som skal kontrollera og føra tilsyn med Statens vegvesen si verksemd knytt til riksveginfrastrukturen.

Vegtilsynet er direkte underlagt vegdirektøren, med eit organisatorisk og styrings­messig skilje mellom Vegtilsynet og resten av Statens vegvesen si verksemd.

Vegtilsynet skal føra tilsyn med at krav om tryggleik knytt til riksveginfrastrukturen er teke i vare av Statens vegvesen.

Vegtilsynet skal arbeida for at Statens vegvesen si verksemd vert utøvd på ein sik­ker og føremålstenleg måte til det beste for trafikantane på vegen.  Tilsynet skal vera ein aktiv pådrivar for eit sikkert og føremålstenleg vegnett i tråd med det overordna målet for transportpolitikken.

Vegtilsynet sine oppgåver omfattar ikkje myndigheitsområde som høyrer inn under andre statlege kontroll- og tilsynsorgan, som Politiet, Direktoratet for samfunnstrygg­leik og beredskap og Arbeidstilsynet.

Vegtilsynet skal i naudsynt utstrekning samordna seg med, og samarbeida med statlege tilsynsorgan og andre verksemder for å byggja kompetanse der dette kan gi ein gevinst ut frå effektiv ressursbruk og brukarvenlegheit.

Vegtilsynet skal vera bygd opp som eit risikobasert systemtilsyn.  For å få eit trygt vegnett, som førebyggjer skade på liv og helse for menneske og dei materielle og økonomiske verdiar som transport på veg representerer, skal vegtilsynet prioritera til­synsverksemda si der risikoen for ulykker er størst.

Vegtilsynet skal m.a.:

• føra tilsyn med at Statens vegvesen har og bruker tilstrekkelege og effektive styringssystem for å ta i vare tryggleik i veginfrastrukturen for transport på riksveg.  Styringssystem omfattar m.a. system for planlegging, bygging, drift, vedlikehald, beredskap og anna forvalting av riksveginfrastrukturen.
• ha tilgong til alle dokument det ønskjer frå Statens vegvesen.
• i tilsynssaker gi tilråding til aktuell driftseining i Statens vegvesen.  Det kan set­jast frist for tilbakemelding.  Tilsynsrapporten er offentleg når den er avgjeven.
• informera om Vegtilsynet si verksemd.
• i samråd med vegdirektøren, delta i internasjonalt arbeid med sikte på å ta i vare Noreg sine interesser på Vegtilsynet sitt ansvarsområde, og delta i inter­nasjonalt arbeid som har verdi for tilsynet sitt arbeid.
• ta initiativ til FoU–verksemd innanfor sitt område.
• foreslå endringar i regelverket så langt det er naudsynt for å betra tryggleik i veginfrastrukturen for transport på offentleg veg.

Vegtilsynet skal via vegdirektøren rapportera til Samferdselsdepartementet i løpet av året og i ein eigen årsrapport om tilsynsarbeidet og resultat.  Saker av spesiell inte­resse skal rapporterast særskilt.

Vegtilsynet si verksemd skal utøvast innanfor gjeldande lover og reglar, og i sam­svar med dei krava som er fastsette i styringsdialogen.  Sakshandsaminga skal skje i samsvar med god forvaltingsskikk og etter dei reglane som gjeld for sakshandsaming i offentleg sektor.

Den daglege leiinga av Vegtilsynet vert utøvd av ein direktør.

Vegtilsynsdirektøren skal:

• orientera og rapportera til vegdirektøren om viktige saker som gjeld Vegtilsynet sitt ansvarsområde.
• utarbeida utkast til årsrapport.
• syta for at Vegtilsynet vert drive effektivt i samsvar med gjeldande lover og reglar og i samsvar med dei krava som vert fastsette i styringsdialogen.
• syta for at det ligg føre dokumenterbare system for intern kontroll og risikosty­ring og at det vert gjennomført evalueringar om tilsynsverksemda si effektivi­tet, måloppnåing og resultat.
• gi tilrådingar i tilsynssaker.

Samferdselsdepartementet har myndigheit til å fastsetja instruks eller foreta end­ringar i instruksen.

Instruksen trer i kraft 20. juni 2012.