DET KGL. JUSTIS- OG POLITIDEPARTEMENT

RUNDSKRIV G-70/90 3139/89 PO OS/vee 02.04.1990

Til alle politimeistrane,
fylkesmennene og lensmennene.

NATUROPPSYN

Motorisert ferdsel i utmark har blitt eit stadig aukande problem i mange distrikt.  Politiet har eit ansvar på dette området for såvel oppsyn som påtale­messig oppfølging av dei ulike brot på lov og regelverk.  I det høve viser ein til Riksadvokaten sitt rundskriv nr. 1523/88 av 05.07.1988, og til påtalemakta si generelle prioritering av miljøkriminalitet.  Det har også vore kontakt mellom Justisdepartementet og Miljøverndepartementet med sikte på å samordne innsatsen mot problemet.

Justisdepartementet ønskjer å auka politi- og lensmannsetaten sin innsats i naturoppsynet, i første rekkje retta mot motorisert ferdsel i utmark. Departementet føreset at alle politi- og lensmannsdistrikt, der det er motorisert ferdsel i utmark, tek oppsyn med i planlegginga av verksemda innanfor dei ordinære budsjettrammene.  Det er grunn til å vise motori­sert ferdsel i utmark merksemd også i høve til den almenne trafikklov­gjevinga med omsyn til promillekøyring, allmenn aktsemd, registrerings­plikt, førarkortplikt m.v.

Lokalt oppmodar ein vidare til å innleia samarbeid med etatar, grunn­eigarar og organisasjonar som har noko med naturforvaltning og oppsyn å gjera for å samordna innsats og utnytting av ressursar.  Det er særleg naturlig å innleia samarbeid med Reinpolitiet, Fjelltenesta og oppsyn i nasjonalparkar det det finst.  I tillegg til å leie og å delta aktivt i eit sam­ordna oppsyn, er det viktig at politiet følgjer opp dei meldingane og observasjonane som samarbeidspartane kan gje.  Ein viser i den saman­heng og til nemnde rundskriv frå Riksadvokaten.

Det er viktig at det er god kontakt mellom lokal forvaltningsmyndigheit (fylkesmann og kommune) og politi- og lensmannsetat som har kontroll­ansvaret.  Det må framfor alt være lik tolkning av regelverk.  Det bør vidare være samsvar mellom forvaltninga si detaljregulering og den kapa­sitet kontrollmyndigheita har til oppfølging.

Departementet rår over ein avgrensa sum til forsterka innsats i naturopp­synet.  Dette vil for det meste bli nytta til innkjøp av materiell som snø­scooterar, transporttilhengarar og anna tilhøyrande utstyr, og også ter­renggåande kjøyretøy for berr mark.  Politiets Materiellteneste syter for sentrale innkjøp samt fordeling av materiell ut frå søknadar og eigne vur­deringar av behov.  Ved slike vurderingar vil det også bli lagt vekt på andre tenestelege oppgåver som redningsteneste og særskilde transport­behov.  Departementet har for i år avgrensa middel til drift og bruk av tildelt materiell.  For komande år må denne verksemda takast inn i den ordinære budsjettplanlegginga.

Ein ser det i dei fleste høve tenleg i tildele materiellet til nokre politikam­mer under den føresetnad at det vert stilt til rådvelde og eventuelt også utplassert ved dei lensmannskontor som treng det mest.  Dei distrikta som ikkje disponerer snøscooter er i første omgang tilvist å leige slike, til dømes av forhandlarar eller privatpersonar.  Ein vil tru at utgiftene til leige ikkje vil bli særleg høgare enn drifts- og vedlikehaldsutgifter til eige mate­riell, og at leigd materiell vil kunne være ei tenleg ordning.

Dei politidistrikt som vert tildelt materiell og middel til drift for 1990 vert tilskrivne.

Etter fullmakt

Ingelin Killengreen

ekspedisjonssjef

Saksbehandlar:

Olav Sande

lensmann